Jeddah (Caasimada Online) – Shirqoolada dowladda Qatar ee ka dhanka ah Sacuudiga iyo dowladaha dariska la ah waxay soo bilaabatay dhawr sano ka hor, waxaana dhawr jeer la helay caddeymo ku aadan arrintaas iyo codad la duubay oo si hoose loo helay.
Laba u dhaq dhaqaaqdo Sacuudiga ayaa labadii maalin ee u dambeysay soo celiyey laba cod oo laga duubay amiirkii hore ee Qatar Hamad bin Khalifa iyo Ra’iulwasaarihii hore ahaana wasiirkii Arrimaha dibadda Hamad bin Jassim kaasoo ay la wadaageen madaxweynihii hore ee dalka Liibiya Muammar Qaddafi waxayna codadkaas ahaayeen kuwa weerar ku ah Sacuudiga iyo qoyska talada hayo.
Labadaan cod oo si qarsoodi ah loo helay sanadkii 2014 ayaa la duubay sanadkii 2003, waxayna caddeenayaan in labadaan Masu’uul ee Qatar ka tirsan ay ka shaqeenayeen sidii Sacuudiga xasilooni darro looga abuuri lahaa isla markaasna loo kala qeybin lahaa.
Mid kamid ah labada Cod ayuu Jassim ku sheegayaa in Sacuudiga uusan sii jirin doonin 12 sano hadda kadib ah, isla markaasna loo qeybin doono dowlado yar yar oo iska soo horjeedo.
Amiirkii hore ee Qatar ayaa qiray in wadankiisa uu sabab u yahay culeyska saaran dalka Sacuudiga isla markaasna aysan sacuudiga sidaan sii ahaan doonin oo la burburin doono, wuxuuna xusay in haddii Mareykanka uu ku guuleysto dagaalka Ciraaq midka xigo uu noqon doono Sacuudiga.
Khalifa ayaa qeexay in Masar iyo Urdon aysan wax karaamo ah laheyn maadaama ay dabadhilif u yihiin Sacuudiga, sidoo kalana wuxuu sheegay inuu caawiyey kooxo badan oo weeraro ka geystay Sacuudiga, isagoo xusay inuu garab siiyey Saad al-Faqih oo u doodo ururka Ikhwaanul Muslimiin ee dalka Masar.
Wuxuu intaas kusii daray inuu bogaadinayo qorshaha gudaha ah ee lagu qalqalinayo Boqortooyada Sacuudiga.
Halkaan hoose ka dhageyso codka sida sirta ah loo helay:
