Doha (Caasimada Online) – Qatar ayaa gaashaanka u daruurtay kuna tilmaantay mid aan sal laheyn liis cusub oo argagixiso oo ay shaaciyeen afar dal oo Carab ah oo xiriirka dalkaasi ugu jaray eedo ah inay taageerto kooxaha xagjirka ah.
Sucuudi Carabiya, Isutagga Imaaraadka Carabta, Masar iyo Baxrayn ayaa 60 qof oo cusub iyo 12 hay’adood ku daray liiska kooxaha xiriirka la leh Qatar.
Hasayeeshee Qatar ayaa sheegaysa in mowqifkeeda ladagaalanka argagixisada uu ka xooggan yahay qaar ka mid ah afartaas dal.
Bayaan ay soo saartay dowladda Qatar ayaa lagu sheegay in ay cambaaraynayso nooc walba oo argagixiso ah ayna gobolka ku hogaamiso dagaalka xidida loogu siibayo dhibaatada, sida in ay shaqooyin abuurtay iyo inay waxbarasho siisay kumannaan qaxootiga Suuriyiin ah.
Goor sii horreysay, Masar ayaa ugu baaqday Golaha Ammaanka ee Qaramada Midoobay inuu baaro eedaha ah in Qatar ay ilaa iyo hal bilyan oo doolar ay siisay kooxo xagjir ah oo ay ku soo furatay xubno ka tirsan qoyska boqortooyada, kuwaas oo la qabsaday iyagoo ugaarsi u joogay dalka Ciraaq.
Dadka listigan ku jira waxaa kamid ah wadaadka caanka ah ee Yusuf Al Qardaawi oo isagu kunool dalka Qatar. Al Qardaawi wuxuu leeyahay urur samafal ah oo ay maalgeliso dowlada Qatar.
Shaqsiyaadka xayiraada la saaray ayaa waxaa ku jira 18 qof oo kasoo jeeda dalka Qatar kuwaasi oo ay ku jiraan ganacsato waaweyn, siyaasiyiin iyo waliba qaar kamid ah qoyska Boqortooyada Qatar.
Listiga Sacuudiga iyo xulafadiisa ayaa waxaa si weyn u cambaareeyey ururada Carabta ee u dooda Xuquuqul insaanka ee loo yaqaan (AOHR).
Caasimada Online
Xafiiska Qaahira
caasimada@live.com
