London (Caasimada Online) – Business Insider oo ah website ku caan baxay arirmaha dhaqaalaha ayaa daaha ka qaaday raadka xun ee uu Dowladda UK u keeni dono dhibaatada Khaliijka iyo go’doominta la saaray Qatar.
Wuxuu websitekaan faafiyey inay go’doominta Qatar ay kusoo aaday waqtigii ugu xumaa dowladda UK, Maadama ay dhawaan ka baxday Yurub , sidoo kalana ay ka dhaceen doorashooyin uusan xisbi helin aqbliyad uu kusoo dhisi karo xukuumad.
Ra’iuslwasaaraha dalka Ingiriiska Theresa May ayaa ka dhawaajisay inay dhibaato weyn oo xagga dhaqaalaha kasoo wajaheyso cuna qabateynta la saaray Qatar, maadaama labada dowladood ay dhawaan kala saxiixdeen heshiis ganacsi oo waaweyn isla markaasna ay Ingiriiska suuqyo iyo ganacsi ka sameyatay dalkaas.
May oo ka hadleysay kulankii ay dhawaan heshiiska ku kala saxiixdeen labada dowladood ayaa tilmaamtay in heshiiskaan ganacsi uu taaban doono dhinacyada: Waxbarashada, Caafimaadka, Culuumta, Baaritaanada, fikradaha, Dalxiiska, Aqoonta, gadiidka, Korontada, Lacagta iyo maalgelinta ganacsiyo yar yar.
Heshiiskaas la kala saxiixday waxaa kamid aheyd ballan qaad ay Qatar sameysay oo ahaa inay 5 Bilyan oo lacagta ingiriiska oo Dollar ahaan noqoneyso 6.36 Bilyan ku maalgashan doonto dalka Ingiriiska, taas badalkeedana dowladda Ingiriiska ayaa iyadana ballan qaaday inay 35 Bilyan oo lacagta ingiriiska ah ay ku maalgashan doonto Qatar.
Dowladda Ingiriiska ayaana hadda tilmaameyso in cuna qabateynta la saaray Qatar ay dhibaato ku noqon doonto heshiisyadaas, isla markaasna ay lagama maarmaan tahay in xal deg deg laga gaaro arrintaas.
Dowladda Qatar ayaa lagu tiriyaa inay tahay suuqa sedexaad ee ugu weyn kaasoo wax loo dhoofiyo Bariga dhexe iyo woqooyiga Africa sida ay sheegeyso tiro koobkii ugu dambeeyey ee kasoo baxay dowladda Ingiriiska.
Waxaa sare u kacay alaabaha ay Ingiriiska u dhoofiso dalka Qatar sanadki 2016 kaasoo noqday 2.13 Bilyan oo lacagta ingiriiska ah halka sanadkii 2013 uu ahaa 1.31 Bilyan, waxaana la filayaa inuu mar kale hoos u dhici doono haddii aan cuna qabateynta laga qaadin Qatar.
Cuna qabateynta la saaray Qatar ayaa dhibaato ku noqoneyso in halkaas alaab loo dhoofiyo, sidoo kalana waxay dhibaato ku tahay maalgelin ay Qatar ka sameyn laheyd dalka Ingiriiska si ay dhaqaale uga sameyso, waxayna maalgelintaas u badan tahay hantida maguurtada ah.
Caasimada Online
Xafiiska London
caasimada@live.com
