Hargeysa (Caasimada Online) – Madaxweynaha Somaliland, Muuse Biixi Cabdi ayaa hambalyo iyo bogaadin u diray shir-guddoonka cusub ee maanta loo doortay golaha wakiillada, kadib guul-daradii xisbigiisa iyo musharaxiintii uu watay ka raacday loolankii adkaa ee Guddoonka Golaha Wakiilada Somaliland
Muuse Biixi oo markii ay soo idlaatay doorashada shir-guddoonku qasriga madaxtooyada ku qaabilay xubnaha cusub ee shir-guddoonka, isagoona sheegay inay ku suntanaan doonto baal dahab oo taariikhi ah.
“Maanta waa maalin taariikhi ah, Somaliland-na waxay ugu suntanaan doontaa baal dahab ah, Ilaahayna wuxuu ina gaadhsiiyey guul weyn oo dhammaan Somaliland ku guulaysatay oo wixii Somaliland jecelina uu ku farxayo, cadowga Somaliland-na uu ku jabayo,” ayuu yiri madaxweyne Muuse Biixi.
Sidoo kale waxa uu hoosta ka xarriiqay in guusha qaranka Somaliland oo dhammi wada leeyahay oo aanay xisbi iyo cid gaar ah sheegan karin, wuxuuna u hambalyeeyey musharaxiintii kale ee kula tartameyey ee sida quruxda iyo Dimuqraaddiyadda leh u hanneeyey natiijada, sida uu hadalka u dhigay.
“Somaliland oo dhan baa guulaysatay eee nin qudha ahi ma guulaysan, xisbina ma guulaysan, guddoomiyaha Baarlamaanka , ku-xigeenka koowaad iyo labaadna waan soo dhaweynayaa, waanan hambalyeynayaa, guddoomiyihii la tartamayeyna waan hambalyeynayaa, tartan isu dhaw buu ahaa, waa Dimuqraaddiyad, sida uu u hambalyeeyey iyo waayeelnimada uu muujiyeyna waan hambalyeynayaa.”
Shir-guddoonka cusub ee golaha wakiillada Somaliland ayaa waxaa maanta loo doortay Cabdirisaaq Khaliif Axmed (Guddoomiye), Siciid Mire Faarax Giirre (Guddoomiye ku-xigeenka koowaad) iyo Cali Xaamud Jibriil oo asagana loo doortay Guddoomiye ku-xigeenka labaad ee golaha.
