Jowhar (Caasimada Online) – Madaxweynaha maamulka HirShabelle, Cali Cabdullahi Xuseen (Guudlaawe) ayaa maanta qaaday tallaabo culus, isaga oo isbeddal ku sameeyay xafiiska Hanti-dhowrka guud ee maamulkaasi.
Cali Guudlaawe oo wareegto soo saaray ayaa xilkii ka qaaday Cabdullaahi Cabdi Bariise oo ahaa Hanti-dhowrka guud HirShabelle, wuxuuna ku beddalay Axmed Sheekh Nuur Iidle.
Hantidhowraha cusub ayaa la faray inuu dardar-geliyo howlaha shaqo ee loo igmaday, waxaana laga codsaday hay’adaha kale ee HirShabelle in ay la shaqeeyaan.
Madaxweynaha maamul goboleedka HirShabelle ayaa maalmihii u dambeeyay waday isbedalo waa wayn, isaga oo sameeyay xilka qaadis iyo magacaabis mas’uuliyiin dhowr ah.
Mudane Cali Cabdullaahi Xuseen (Cali Guudlaawe) Madaxweynaha Hirshabeelle ayaa xilka ka qaaday Cabdullaahi Cabdi Bariise oo ahaa Hanti-dhowrka Guud ee Hirshabeelle.
Madaxweynaha ayaa marka uu arkay qoddobka 60-aad farqadiisa 1-aad xarafka (b) ee dastuurka Hirshabeelle iyo sida ay muhiim u tahay in isbeddel lagu sameeyo Hanti-dhowrka Guud ee Hirshabeelle waxa uu Guddoomiyaha Hanti-dhowrka Guud u magacaabay Mudane Axmed Sheekh Nuur Iidle.
Ugu dambeyn Madaxweynaha Hirshabeelle ayaa faray Guddoomiyaha cusub ee Hanti-dhowrka Guud dardargelinta iyo qaabeynta shaqadda loo idmaday.
