Muqdisho (Caasimada Online) – Tan iyo markii ay bilaabatay xiisadda Soomaaliya iyo Itoobiya waxaa la sugayay tallaabo adag oo ay qaado Soomaaliya, maadaama ay Itoobiya ku xad-gudubtay qarannimadeeda.
Dowladda Soomaaliya ayaa la filayay inay xirto safaaradda Itoobiya ee Muqdisho, taas oo dad badan qabeen inay tahay tallaabada ugu adag ee ay ku muujin karto mowqifkeeda, balse wey ka baaqsatay.
Wasiirka arrimaha dibadda Soomaaliya oo bixiyay wareysi cusub ayaa sheegay in sababta ka dambeysa arrintaan ay tahay in uusan si rasmi ah u go’in xiriirka labada dal, ayna weli safaaradda Soomaaliya ka furan tahay Addis Ababa.
“Weli labada dal cilaaqaadkii ma go’in safaaraddeenna weli waa ka furan tahay Addis Ababa diblumaasiyiinteenna way jiraan,” ayuu yiri wasiir Fiqi.
Wasiirka ayaa sidoo kale ka hadlay sababta ay dowladda Soomaaliya u qaadan la’dahay go’aan rasmi ah oo lagu xirayo gabi ahaan safaaradda Itoobiya, waxa uuna sheegay in aan loo baahneyn caadifad, balse dowlada federaalka ay ku dhaqmeyso diblumaasiyad
“Horta safiirka sida uu u baxay ayuu maqan yahay diblumaasiyiinta kale ee meesha joogay way joogaan, fasaxyo iyo dalalkooda si ikhtiyaar ah kuwa ugu maqan maahinee way ku qoran yihiin meesha” ayuu yiri wasiir Fiqi.
Si kastaba, Dowladda Soomaaliya ayaa meel adag iska taagtay heshiiskii ay Itoobiya la gashay Somaliland ee dhabaha u xaarayay damaca badda, iyadoo caalamka ku dacweysay xukuumadda Abiy, oo ayadu qaadaay tallaabada qaras ka tuurnimada.
