Washington (Caasimada Online) – Doorashada dalka Maryekanka ayaa maanta soo gabagabowday, waxaana mar kale dib loogu doortay Donald Trump oo noqday madaxweynaha 47-aad, isaga oo ka adkaaday Kamala Harris iyo Xisbigeeda Dimuqraadiga.
Trump ayaa illaa hadda xaqiijiyey 277 oo ah ergada codeynta ama Electoral College, halka Kamala Harris ay illaa hadda ku guuleysatay 224. Trump ayaa u baahnaa 270 si uu noqdo madaxweyne.
Waa markii labaad ee uu xilkan qabanayo Donald Trump, waxaana guushiisa wel-wel ku abuurtay Madowga, Muslimiinta, dadka soo-galootiga iyo Iran oo uu muddo xileedkiisii hore 2016-2020 saarey cunaqabateyntii ugu adkayd ee dhaqaalaha waddankaasi.
Haddaba sidee guusha TRUMP u saameyn kartaa Bariga Dhexe?
Maxamed Cali Biixi oo ah Wariye Soomaaliyeed oo deggan Nairobi, isla markaana ka faallooda arrimaha Bariga Dhexe oo xiisado dagaal ay ka jiraan ayaa sheegay in natiijada soo baxday ee doorashada Mareykanka ay saameyn wayn ku yeelaneyso gobolkaas iyo dalal Islaamka, isaga oo sheegay in Washington ay si gooni ah ugu lug leedahay.
“Mareykanka waa waddan wayn oo dhinaca dhaqaalaha iyo milatarigaba adduunka hoggaamiya, mar kastaana doorashadiisa saameyn ayay ku leedahay marka la eego dunida Islaamka, saameynta goonida ah ee iyaga ku leedahay waxaa weeyaan gobolkan oo ay ku badan yihiin oo ah gobol ay xasarado ka jiraan, si weyn loogu loolamayo” ayuu yiri Biixi.
Sidoo kale wuxuu soo hadal qaaday arrinta magaalada Gaza iyo dagaalka cusub ee ka dhex-qarxay Israel, Lubnaan iyo Iran, kaas oo hadda gaaray meeshii ugu xumeyd.
“Waxaan ognahay xaaladda Gaza oo uu Mareykanka saameyn ku leeyahay oo dagaallada halkaasi ka socda ay Israel ka waddo, Mareykankan si gooni ah ayuu ugu lug leeyahay iminkana waxaa sii dheer Lubnaa iyo Iran oo uu dagaalka kusii fiday” ayuu sii raaciyay hadalkiisa.
Isbeddelka ka dhacay Mareykanka ayaa isha lagu haayaa, maadaama Trump uu yahay nin ad-adag oo siyaasaddiisa ku dhufta meelo badan, sida la xasuusto muddo xileedkiisii hore.
