Muqdisho (Caasimada Online) – Taliska Ciidamada Booliska Soomaaliyeed oo warsaxaafadeed soo saaray ayaa looga hadlay xarrigga loo gaystay guddoomiyaha Urur-Siyaasadeedka Shacabka, Cabdiraxmaan Saleebaan Jaamac oo u xiran dowladda Soomaaliya, wuxuuna Boolisku soo bandhigay kiis xasaasi ah oo loo haysto siyaasigan.
Taliska Qaybta Booliska Gobolka Banaadir ayaa sheegay in Cabdiraxmaan laga soo xiray degmada Xamarweyne, loona haysto inuu ku kacay falal liddi ku ah amniga qaranka, balse ma bixin faah-faahin dheeri ah.
Booliska ayaa sidoo kale shaaca ka qaaday in guddoomiyaha la horgeyn doono maxkamad, si looga qaado tallaabo adag oo sharciga waafaqsan.
“Ciidanka Boliiska Soomaaliyeed gaar ahaan Saldhigga Boliiska Xamarwayne oo gudanaya waajibaadka Qaranka ayaa soo xiray eedeysane C/Raxmaan Suleymaan Jaamac, kaas oo ku kacay falal liddi ku ah amniga Qaranka. Waxaana la horgeyndoonaa Maxkammada Awooda u leh Insh-Allah” ayaa lagu yiri warka kasoo baxay Booliska.
Taliska Booliska ayaa sidoo kale farriin culus u diray dadka Soomaaliyeed, wuxuuna ugu baaqay inay ka fogaadaan inay dhiirogeliyaan kooxda Al-Shabaab.
“Waxaa lagu wargalinayaa muwaadiinta soomaaliyeed in ay ka fogaadaan dhiiragalinta Cadawga Khawaarijta ah Ruux walba oo ku kaca falal liddi ku ah Ammanka Qaranka Waxa uu wajihidoonaa hay,addaha Cadaalada” ayaa mar kale lagu yiri bayaanka.
Dhanka kale, Madaxweynihii hore ee Soomaaliya, Maxamed Cabdullaahi Maxamed (Farmaajo) ayaa si adag u cambaareeyay xarig uu ku tilmaamay sharci darro oo ay laamaha ammaanka dowladda Federaalka u geysteen Guddoomiyaha Urur-siyaasadeedka Shacabka, Mudane Cabdiraxmaan Saleebaan Jaamac.
Farmaajo ayaa sheegay in arrintani ay muujinayso jihada siyaasadeed ee uu qaatay Madaxweyne Xasan Sheekh Maxamuud, gaar ahaan nooca doorasho ee uu hiigsanayo.
“Xarigga sharci darrada ah ee laamaha ammaanka Federaalka Soomaaliya ay u geysteen Guddoomiyaha Urur-siyaasadeedka Shacabka Mudane Cabdiraxmaan Saleebaan Jaamac waxa uu muujinayaa nooca doorashada ee uu doonayo Madaxweyne Xasan Sheekh Maxamuud iyo hannaanka siyaasadeed ee uu qaatay,” ayuu yiri Madaxweyne hore Farmaajo bayaan uu soo saaray maanta.
Sidoo kale, Xisbiga Himilo Qaran ee uu hoggaamiyo madaxweyne hore Sheekh Shariif Sheekh Axmed ayaa isna si xooggan u cambaareeyay tallaabada ee ay ciidamada ammaanka ay ku xireen siyaasiuga Cabdiraxmaan Saleebaan Jaamac.
“Falkaani oo u dhigma afduub siyaasadeed, wuxuu xisbiga Himilo Qaran u arkaa mid gebi ahaanba baalmarsan shuruucda iyo dastuurka dalka, wuxuuna sidoo kale xarigaani waji gabax ku yahay Xukuumadda Federaalka ah maadama ay madaxda dowladu caado ka dhigteen caburin joogta ah oo taabanaysa ururada siyaasadda iyo saxaafadda xorta ah” ayaa lagu yiri warsaxaafadeedka kasoo baxay Xisbi Siyaasadeedka Himilo Qaran.
Tallaabadan ayaa kusoo aadeyso xilli hadda dalka ay ka taagan tahay xiisad siyaasadeed oo u dhexeyso madaxda sare ee dalka iyo siyaasiyiinta mucaaradka, taas oo ka dhalatay sida loo wajahayo hanaanka doorashooyinka 2026-ka, waxaana haatan laga war sugayaa natiijada kasoo bixi doonto gogosha uu dhigay Madaxweyne Xasan Sheekh.
