Garoowe (Caasimada Online) – Sida aan wararkeena hore ku sheegnay daadad xoogan ayaa kusoo rogmay Magaalada Qardho ee xarunta gobolka karkaar kuwaas oo magaalada kaga yimid togag kala duwan.
Biyahaan oo aad u xoogan ayaa jaray inta badan waddooyinka magaalada, waxa ayna sidoo kale dhulka dhigeen Guryo dhowr ah, halka Gaadiid badan ay horay usii qaaden.
Daadadkaan ayaa sababay hakat ku imaaday isu socodkii gaadiidka u kala gooshi jiray magaalada boosaasoo iyo gobolada kale ee dalka.
Daadadka ayaa geystay khasaare hantiyeed waxayna galeen goobo ganacsi oo kala duwan sidoo kale waxa uu saamayn wayn ku yeeshay roobku ganacsatadii yaryarayd ee magaalada.
Daadka xalay magaalada kusoo rogmaday ayaa ahaa mid aad u tira badan biyaha ayaana is haystay in ta u dhaxaysa xarunta gobolka karkaar ilaa iyo masaajidka mawlaca.
Sidoo kale, waxaa iyaguna gebi ahaanba qarsoomay suuqa wayn ee magaalada iyo beerihii ku dhexyaalay, taasina waxa ay muujinaysaan sida ay biyahaan u tira badnaayeen iyagoo soconayay in ka badan todobo saacadood.
