Galcad (Caasimada Online) – Wararka naga soo gaaraya gobolka Galgaduud ayaa sheegaya in ciidamada Xoogga iyo kuwa dadka deegaanka ay howlgal ka sameeyeen deegaanka Cowsweyne ee gobolkaasi, kaas oo ay kusoo qabteen xubno Shabaab ah.
Ragga lasoo qabtay ayaa isugu jiro horjoogayaal iyo maleeshiyaad ka tirsan kooxda Al-Shabaab, sida ay shaaca ka qaaday warbaahinta dowladda.
Xubnaha nolosha lagu soo qabtay waxaa kamid ah horjoogayaasha kala ah Cabdiraxmaan Foodey kulmiye, Cabdullaahi Ibraahim Xasan , Aadan Ibraahim Abshir iyo malleeshiyaad kale, kuwaas oo lagu soo bandhigay gudaha deegaanka Cowsweyne oo ay shalay la wareegeen ciidamada huwanta.
Saraakiisha ciidamada Xoogga dalka ayaa shaaca ka qaaday in raggan oo duurgal ah lagu soo qabtay howlgal ay ka sameeyeen halkaasi, ayna hadda ku hayaan gacanta.
Sidoo kale xubnahan ayaa waxaa lagu eedeeyay inay muddo ka shaqeynayay dhibaateynta shacabka Cowsweyne, isla-markaana laga qaadi doono tallaabo adag.
Soo qabashada raggan aya ka dambeysay, kadib markii ay ciidamada dowladda iyo kuwa Macawiisleyda ay u dhaqaaqeen aagga degmada Ceelbuur, halkaas oo ay joogaan Shabaab.
Ujeedka ciidamada ayaa ah inay xoreeyaan degmadaas iyo dhammaan deegaanada kale ee u dhow oo ay xubnaha Al-Shabaab ku sugnaayeen 15 sanadood ka badan.
Ciidamada huwanta ayaa haatan la wareegay magaalada Baxdo, deegaanka Cowsweyne iyo tuulooyin kale oo ka tirsan gobolka Galgaduud ee bartamaha Soomaaliya.
Xaaladda ayaa haatan ah mid aad u kacsan, waxaana dhaq-dhaqaaqy ugu dambeeyay laga dareemaya aagga magaalada Ceelbuur oo ay kusii dhawaanayaan ciidamada huwanta.
