Muqdisho (Caasimada Online) – Dowladda Federaalka Soomaaliya ayaa war cusub ka soo saartay diyaarad galabta ku dhacday deegaano ay joogaan Al-Shabaab oo ka tirsan gobolka Galgaduud.
Dowladda ayaa sheegtay in diyaaradaas ay laheyd Qaramada Midoobey, isla markaana ay aheyd nooca loo adeegsado gargaarka degdegga ah, waxayna caawineysay oo daawo u siday ciidanka xoogga dalka.
“Diyaarad ay leedahay Qaramada Midoobay oo loo adeegsado dhanka gurmadka degdegga ah oo caawineysay Dowladda Federaalka Soomaaliya ayaa ku dhacdey goob ku taalla Dowlad Goboleedka Galmudug oo ay ka taliyaan Khawaarijta Al Shabab,” ayaa lagu yiri warka dowladda.
Qoraalka dowladda ayaa intaas ku sii daray, “Wararka hordhaca ayaa sheegaya in diyaaradda ay la soo gudboonaatey cillad farsamo, kadibna ay halkaasi ku dhacdey.”
Sidoo kale dowladdu waxay qoraalkaan ku shaacisay in diyaaradda ay la socdeen sideed qof oo shaqaale ah oo isugu jiray ajaanib iyo Soomaali.
Warkaan waxaa lagu xaqiijiyey in dadkii saaraa diyaaradaas ay u gacan galeen Al-Shabaab, isla markaana uu socdo howlgal ay ku soo badbaadinayaan ciidanka xoogga dalka Soomaaliyeed.
“Waxaa diyaaradda saarnaa 8 shaqaale ah oo isugu jiray ajnabi iyo Soomaali. Iyadoo Ciidamada Qalabka Sida ay ku guda jiraan badbaadinta shaqaalihii saarnaa, ayaa waxan idin la soo wadaagi doonaa hadba waxa ku soo kordha dhacdadan,” ayaa lagu yiri qoraalka.
Diyaaradaan waxay galabta ku dhacday deegaan lagu magacaabo Xiindheere oo ka tirsan gobolka Galgaduud, xilli ay ka yimid Beledweyne una socotay magaalada Wisil.
Waxaa la sheegay in diyaaraddu siday daawo loogu tala galay ciidanka qaranka ee ka dagaalamaya gobolka Mudug, cilad aan la shaacin nooca ay tahay ayaa la sheegay inay ku timid diyaaradda, mana dhicin ee waxaa loo dejiyey si ku talagal ah, sida ay noo xaqiijiyeen ilo xog ogaal ah.
