Muqdisho (Caasimada Online) – Warar kala duwan ayaa kasoo baxaya ganacsato dil iyo dhaawac maanta loogu gaystay gudaha magaalada Muqdisho, gaar ahaan agagaarka isgoyska Fagax.
Ilo wareedyo lagu kalsoon yahay ayaa inoo sheegay in rag ku hubeysan bistoolado ay weerareen kaalin shidaal oo ku taalla halkaasi, waxayna dileen mid kamid ah wiilashii ganacsatada ahaa ee ku sugnaa, iyaga oo dhaawacay mid kale.
Wararka ayaa intaasi ku daraya in kaalinta shidaalka ay ku xirneyd kaamirada qarsoon ee CCTV oo ay dhowaan ganacsatada inay xirtaan ku amartay dowladda Soomaaliya.
Kooxda dilka fulisay ayaa durbadii meesha ka baxsatay, waxaana goor dambe goobta gaaray ciidamo ka tirsan kuwa ammaanka ee dowladda Soomaaliya oo howlgallo kooban ka sameeyay aagga isgoyska Fagax.
Weerarkan ayaa qayb ka noqonayo beegsiga lagu hayo ganacsatada Muqdisho oo dhibane u noqday amarka dowladda, waxaana weeraro ay kala kulmayaan kooxda Al-Shabaab.
Maalmo ka hor ayaa sidaan oo kale xaafadda Soona-key loogu dilay mid kamid ahaa ganacsatada, iyada oo isla goobtaas lagu dhaawacay mid kale, waxaana loo beegsaday kaamiro ay ku xireen dukaankooda.
Waxaa sidoo kale kasii horreeyay dhacdo kale oo lagu dilay saddex ganacsato ahaa oo dhowaan dil loogu gaystay degmada Dayniile ee gobolka Banaadir, kuwaas oo goobahooda ganacsi ku xiray Kaamiro CCTV, waxaana toogasho ku dilay rag afka soo duubtay oo ugu tegay xarumahooda.
Horay sidaan oo kale Al-Shabaab ayaa u beegsatay goobo ganacsi oo lagu xiray kaamirooyinka CCTV, kadib amar kasoo baxay dowladda, waxaana xarumaha qaar lala beegsaday qaraxyo u geystay khasaarooyin lixaad leh.
Inta badan ganacsatada reer Muqdisho ayaa u hoggaansamay amarka dowladda, laakiin waxa ay u noqdeen dhibanayaal, maadaama ay beegsanayaan maleeshiyaadka Al-Shabaab.
