Laascaanood (Caasimada Online) – Hoggaanka maamulka SSC-Khaatumo ayaa si rasmi ah loogu dhawaaqay, kadib muddo ay hoggaaminayeen guddiga 33-ka ah ee Isimida SSC.
Hoggaanka cusub ee SSC-Khaatumo ayaa ka kooban 45 xubnood oo laga soo kala xulay garaadada iyo salaadiinta beelaha gobollada SSC.
Xubnahan ayaa noqon doona kuwa maamulaya arrimaha masiiriga guud ee gobollada Sool, Sanaag iyo Ceyn, iyada oo shaqada ugu horeysa ee loo igmaday ay tahay in deegaanadooda ka saaraan Somaliland.
Hoggaanka cusub ee SSC ayaa waxaa ID-ga aqoonsiga xubinada hoggaanka maamulka lagu guddoonsiiyay munaasibad ay goobjoog ka ahaayeen Golaha sare ee dhaqanka SSC-Khaatumo, Maayirka, Maayir ku-xigeenka, xoghayaha fulinta degmada, xildhibaanada golaha deegaanka iyo garyaqaanada sharciga.
Maalmaha soo socda ayaa hoggaanka cusub ee SSC loo dhaarin doonaa masuuliyadan, ayaga oo sidoo kale markaas qaban doona shaqooyinka kale ee loo igmaday socod-siinteeda.
Xiisadda Laascaanood ayaa weli kacsan, ayada oo weli dagaalladu ay ka socdaan bariga iyo galbeedka magaaladaas oo ay isku horfadhiyaan ciidamada labada dhinac.
Wararka ayaa sheegaya in milatariga Somaliland iyo ciidanka deegaanka ay haatan dhaq-dhaqaaqyo iska soo horjeedo ka wadaan halkaasi, taas oo uga sii dareyso xiisadda taagan.
Labada dhinac ayaa sidoo kale waxay heleen gurmadyo kala duwan oo ciidan ah, kuwaas oo maalmihi u dambeeyay gaaray duleedka Laascaanood, si ay ugu biiraan dagaalka ka socda halkaasi.
Si kastaba, Xaaladda Laascaanood ayaa u muuqata mid kasii dareysa, waxaana horay u fashilmay dhammaan isku dayadii la sameeyay ee ku aadana in la joojiyo dagaalka, kadibna la wada-hadlo.
Xiisaddan cusub ayaa kusoo aadeysa, ayada oo bayaan kasoo baxay Golaha Ammaanka ee QM looga hadlay xaaladda adag ee ka jirta magaalada Laascaanood ee gobolka Sool, ayada oo Somaliland loogu baaqay in ciidamadeeda ay kala baxdo aagga Laascaanood, sidoo kalena ay is xakameeyaan ciidamada SSC, si gargaar loo gaarsiiyo dadka ay waxyeelada soo gaaray.
