Washington (Caasimada Online) – Ilhaan Cumar ayaa guul muhiim ah ka gaartay doorashadii ay gashay ee ka dhacday dalka Mareykanka.
Ilhaan ayaa waxay u mahad-celisay dadkii u codeeyay, iyada oo sheegtay in ay ka shaqeyneyso tallaabooyinka lagu horumarinayo bulshada ay metasho ee soo doortay.
Dad badan ayaa hadal heyn ka dhaliyay baraha bulshada markii la xaqiijiyay in ay guuleysatay Xildhibaan Ilhaan Cumar, xilli Donald Trump mar kale dib loo doortay, kadib doorasho adag oo shalay ka dhacday dalkaasi, isaga oo ka guuleystay madaxweyne ku-xigeenka Mareykanka Kamala Harris.
Waxyaabaha lasoo qaadayo waxaa kamid ah in Ilhaan iyo Trump marar badan ay is dhaafsadeen hadallo adag, haddii ay markale saaxada siyaasadda isku arkaan howshu halkeeda kasii socon doonto waa sida hadalka loo dhigay.
Inkasta oo weli natiijada gobollada qaar aan si rasmi loo go’aamin, ayaa haddana Trump waxaa illaa la saadaaliyey inuu ku guuleysatay tirada ergada codeynta ee ku filan, si uu madaxweyne u noqdo.
Trump ayaa illaa hadda xaqiijiyey 277 oo ah ergada codeynta ama Electoral College, halka Kamala Harris ay illaa hadda ku guuleysatay 224. Trump ayaa u baahnaa 270 si uu noqdo madaxweyne.
Trump ayaa goor-dhow la saadaaliyey inuu ku guuleysan doono gobolka Wisconsin iyo 10-kii ergo cod, taasi oo dhaafsiisay 270-ka ergada codeynta ee uu u baahahn yahay.
Trump ayaa ku guuleystay gobollo badan oo muhiim ah, oo ah kuwa aadka loogu loolamo, sida Pennsylvania, Georgia iyo Wisconsin. Saddexdan gobol ayaa waxaa 2020 ku guuleystay madaxweyne Joe Biden.
Dhinaca kale, Jamhuuriyiinta ayaa waxay la wareegeen aqlabiyadda Aqalka 100-ka xubnood ka kooban ee Senate-ka, laakiin weli lama oga xisbiga maamuli doono Aqalka Wakiilada Mareykanka.
