Garoowe (Caasimada Online) – Mid kamid ah burcad badeeddii kal horey qabsatay markabkii MV Abdullah ayaa la qabtay, sida uu shaaciyay taliska ciidanka booliska Puntland.
Markabkan oo lagu sii daayey madax furasho gaareysa illaa 5 milyan oo dollar, ayey muddooyinkii dambe laamaha amniga ku daba jireen xubnihii burcad badeedka ahaa ee markabkaasi qabsaday.
Qoraal kasoo baxay taliska ayaa lagu sheegay in howl-gal ay aroornimadii hore ee saaka si wadajir ah u fuliyeen ciidanka booliska iyo kuwa PMPF oo ka dhacay degmada Eyl ee gobolka Nugaal lagu soo qabtay eedaysane Cabdiqani Dayib Awnuur (Soolle).
“Ciidanka oo lasocday xogta eedaysane Cabdiqani Dayib Awnuur (Soolle) ayaa ku qabtay deebaha dhaca degmada Eyl iyo deegaanada ku xeeran oo uu ku dhuumaalaysanayey,” ayaa lagu yiri qoraalka kasoo baxay booliska Puntland.
Sidoo kale waxa lagu yiri qoraalka “Dowlada Puntland ayaa dagaal adag kula jirta kooxa burcad badeedka ah kuwaas oo dhibaato lixaadle kuhaya dadka iyo badwabka deegaankaba.”
Markabka MV Abdullah oo la afduubay bartamihii bisha March ee sanadkaan ayaa madax furasho lagu sii dayay 13-kii April kaddib markii laga qaatay lacag madax furasho ah oo dhan 5 milyan oo dollar.
Burcad baddeeda markabka gacanta ku hayey ayaa horey laamaha amniga ugu sheegeen ilaa afar nin, kuwaas oo markabka ka soo qafaashay biyaha caalamiga.
Burcad baddeeda Soomaalida ayaa dib u soo celiyey weeraroodii dhammaadka sanadkii 2023-kii, markaas oo ay afduuben doon laga leeyahay dalka Iiran oo markii danbe ay soo furteen ciidamada badda ee Hindiya.
Si kastaba, xooggaysiga weerarada burcad baddeeda ayaa bilowday markii ay korortay xiisadda ka taagan badda cas oo ay kooxaha Xuutiyiinta Yemen weerar ku qadeen maraakiib ganacsi oo gooshaysay marin biyoodkaas muhiimka ah.
