Garoowe (Caasimada Online) – Maamulka Puntland ayaa markii ugu horreysay meesha ka saaray in khilaafka kala dhaxeeya dowladda federaalka Soomaaliya uu salka ku hayo magacaabista ra’iisul wasaare Xamza ama metelaada kursiga uu ku fadhiyo.
Madaxweyne ku-xigeenka Puntland Ilyaas Cilmi Lugatoor ayaa beeniyay arrintaas, isagoo sheegay in dowladda federaalka ay uga soo horjeedan in ay tahay siyaasadda iyo aragtida ay ku shaqeynayso dowladda dhexe.
“Qof kasta oo yimaada kursiga ra’iisul wasaaraha ama madaxweynaha Soomaaliya, haddii uu ku shaqeynayo aragti ka hor imanaysa danaha Puntland, waanu ka hor iman doonaa, xitaa haddii uu kasoo jeedo Puntland,” ayuu yiri madaxweyne ku-xigeenka Puntland Ilyaas Lugatoor.
Sidoo kale wuxuu xaqiijiyay in maamulka uu diyaar u yahay la shaqeynta dowladda federaalka haddii ay kusoo laabato “ku shaqeynta dasturkii lagu heshiiyay” sida uu hadalka u dhigay madaxweyne ku-xigeenka Puntland.
“Khilaafka waxa uu ka yimid waa ku shaqeynta dastuurka lagu heshiiyay, mar walbana waxay Puntland diyaar u tahay inay la shaqeyso dowladda federaalka haddii lagu laabto dastuurka,” ayuu yiri Lugatoor, oo xoojiyay diidmada Puntland ee ku aadan wax ka beddelka dastuurka ee ay gadaal ka riixeyso Villa Somalia.
Hadalkan ayaa imaanaya xilli uu magaalada Muqdisho maalintii labaad ka socdo shirka golaha wadatashiga qaran oo markii shanaad ay dibad joog ka tahay Puntland.
Si kastaba, madaxweynaha Puntland Saciid Deni ayaa tan iyo markii uu sii xoogeystay khilaafka kala dhaxeeya madaxweyne Xasan Sheekh qaadacay ka qeyb-galka shirka golaha wadatashiga, oo maamulka uu sheegay in aysan ku mateli karin masiirka arrimaha Soomaaliya .
