Laascaanood (Caasimada Online) – SSC-Khaatumo oo ka hadashay maqnaashaha Puntland iyo Jubbaland ayaa sheegtay inay lagama maarmaan tahay in dowladda federaalka Soomaaliya ay raadiso labada maamul goboleed.
Baarlamaanka SSC-Khaatumo oo maanta ka dooday go’aannada wax ka beddelka dastuurka, kaas oo guddiga gacanta ku haya ay soo gaareen magaalada Laascaanood ayaa waxay bogaadiyeen dadaalada ay xukuumadda federaalka Soomaaliya ku bixineyso dhameystirka dastuurka dalka.
“Goluhu waxa uu bogaadinaya in bulshada reer SSC laga qeyb-galiyay ka tala bixinta arrimaha dhameystirka dastuurka, sidoo kalena wuxuu goluhu lagama maarmaan u arkaan in wax ka beddelka dastuurka JFS uu noqdo arrin loo dhan yahay oo ay ku mideysan yihiin dowladda federaalka ah iyo dhamaan dowladaha xubnaha ka ah,” ayaa lagu yiri go’aanno kasoo baxay golaha baarlamaanka maamulka SSC-Khaatumo.
Waxa kale oo lagu yiri qoraalka “Waa lagama maarmaan in la raadiyo dowladaha Puntland iyo Jubbaland iyo dhamaan cid kasta oo xaq u leh in wax laga weydiiyo si loo xaqiijiyo tala wadaag iyo isla ogol siyaasadeed, kaas oo bulsjada Soomaaliyeed u horseeda midnimo, horumar iyo xasilooni siyaasadeed.”
Golaha ayaa sidoo kale waxa uu xasuusiyo madaxda dowladda federaalka Soomaaliya iyo daneeyayaasha arrimaha Soomaaliya in ay lagaka maarmaan tahay in maamulka SSC-Khaatumo iyo dadkiisu ay helaan xuquuqdooda ay ku leeyihiin Soomaaliya, sida; arrimaha gargaarka, horumarinta iyo matalaadda siyaasadeed.
“Goluhu wuxuu ugu baaqayaa madaxda dowladda federaalka iyo madaxda dowlasaha xubnaha ka ah dowladda federaalka in ay u midoobaan ka shaqeynta danaha bulshada Soomaaliyeed kana fogaadaan waxkwstsa oo keeni kara is-khilaaf iyo kala fogaan ama ku dhisan dana gaar ah, wixii kala aragti duwanaan ahna lagu dhameeyo wadahadal iyo wada xaajood.”
