Washington (Caasimada Online) – Kooxda Al-Shabaab ayaa khatar weyn kusii noqonaysa amniga gudaha Soomaaliya, arrintaas oo ay sabab u tahay iskaashi cusub oo ay la yeelatay kooxda Xuutiyiinta Yemen, waxaa sidaas sheegay Taliyaha Ciidamada Maraykanka ee Qaaradda Afrika (AFRICOM), Khamiistii.
Ciidanka Maraykanka ayaa kordhiyay hawlgallada ka dhanka ah Al-Shabaab kadib markii Madaxweynaha Maraykanka Donald Trump uu xafiiska la wareegay, iyagoo fulinaya olole ballaaran oo lagula dagaallamayo kooxda argagixisada ah ee ka howlgasha gudaha Soomaaliya.
Sabtidii lasoo dhaafay, ciidamada Maraykanka ayaa duqeyn cirka ah ka fuliyay gudaha Soomaaliya, taas oo lagu dilay xubno ka tirsan kooxda ISIS, sida lagu sheegay war kasoo baxay Taliska Ciidamada Afrika ee Maraykanka (AFRICOM).
Taliyaha AFRICOM, General Michael Langley, ayaa sheegay in Maraykanku si xooggan u beegsanayo Al-Shabaab.
“Madaxweynaha iyo Xoghayaha Gaashaandhigga waxay ii fasaxeen awoodo dheeraad ah,” ayuu Langley ka sheegay fadhigii Guddiga Adeegyada Ciidamada ee Senate-ka (SASC). “Hadda waxaan haystaa awood aan ku qaado weerarro culus,” ayuu hadalkiisa ku daray.
Maamulka Trump ayaa awoodda go’aamada weerarrada si toos ah uga wareejiyay Madaxweynaha, una wareejiyay Xoghayaha Gaashaandhigga iyo Taliyaha Hawlgallada, si loo dedejiyo habka go’aan-qaadashada. Tani waxay ka duwan tahay siyaasaddii maamulka Biden, oo ahayd in weerar kasta uu helo oggolaanshaha Aqalka Cad ka hor inta aan la fulin.
Agaasimaha Hawlgallada ee Taliska Guud, Lieutenant General Alex Grynkewich, ayaa horey u sheegay in nidaamkan cusub “uu noo suurtagelinayo inaan la jaanqaadno xaaladaha goobta dagaalka, si aan fursadaha uga faa’iidaysano oo cadaadis joogto ah ugu sii hayno kooxda Xuutiyiinta.”
Jimcihii, Xarunta Daraasaadka Istiraatiijiyadda iyo Caalamiga ah (CSIS) ayaa warbixin ay soo saartay ku sheegtay in Al-Shabaab ay ka faa’iideysaneyso xiriirka sii kobcaya ee ay la leedahay kooxda Ansar Allah ee Yemen, oo ku caan ah magaca Xuutiyiinta.
Iskaashigan cusub ayaa u suurtagelin kara al-Shabaab inay weerarto maraakiibta iyadoo adeegsanaysa diyaarado aan duuliye lahayn ama xitaa gantaallo, sida lagu sheegay qiimeyn cusub oo ay sameysay Xarunta Daraasaadka Istiraatiijiyadda iyo Caalamiga ah (CSIS).
Warbixintu waxay soo xigatay la-taliye sare oo ka tirsan Isbahaysiga Difaaca Qaranka ee kasoo horjeeda Xuutiyiinta, kaas oo sheegay in Xuutiyiintu qorsheynayaan inay siiyaan al-Shabaab hub casri ah si ay u weerari karto maraakiibta maraysa Gacanka Cadmeed.
“Xuutiyiintu waxay siin karaan, ama durba siiyeen, al-Shabaab faa’iidooyinka dawlad taageerta urur argagixiso,” ayaa lagu yiri warbixinta, iyadoo si gaar ah loo xusay tababarro milatari iyo teknoolojiyadda diyaaradaha aan duuliyaha lahayn.
