Muqdisho (Caasimada Online) – Madaxweynaha Soomaaliya Xasan Sheekh Maxamuud ayaa galabta xafiiskiisa ku qaabilay Safiirka Jarmalka ee Soomaaliya Danjire Sebastian Groth, iyagoo ka wadahadlay arrimo badan oo ku saabsan labada dal.
Kulanka oo ka dhacay xarunta Madaxtooyada Soomaaliya ayaa intii uu socday wuxuu Madaxweyne Xasan Sheekh uga warbixiyey safiirka, muhiimadda ay leedahay in sare loo qaado taageerada Jarmalka Soomaaliya.
Madaxweyne Xasan Sheekh ayaa Jarmalka ka dalbaday in dowladda Soomaaliya ay ka taageeraan dhinacyada muhiimka u ah dadaallada dowlad-dhiska Soomaaliya.
Waxyaabaha kulankaan sida hoose loogu gorfeeyey waxaa kamid ah sida ay ku suurta geli karto in dowladda Jarmalka ay dib u soo celiso barnaamijyadeedii Soomaaliya ee farsamada gacanta.
Madaxweynaha Soomaaliya ayaa safiirka u cadeeyey in Barnaamijyadaan ay muhiim u yihiin horumarinta iyo xasilinta dalka oo dhan, maadaama Soomaalidu u baahan tahay maalgashi iyo shaqo abuur xoog leh.
Dhankiisa, Danjire Sebastian Groth ayaa sharaxay iskaashiga xooggan ee ka dhaxeeya labada dowladood ee Soomaaliya iyo Jarmalka iyo sida loo sii hormarin karo.
Sidoo kale Safiirka Jarmalka ee Soomaaliya ayaa dowladda Soomaaliya ku adkeeyey inay sii waddo horumarinta geeddi socodka dimuqraadiyeynta iyo ka shaqeynta horumar, si barwaaqo loo gaaro mustaqbalka fog ah.
