Boosaaso (Caasimada Online) – Hay’adda sirdoonka Mareykanka ee CIA-da ayaa xafiis ku-meel-gaar ah ka furatay magaalada Boosaaso, sida ay shaacisay shabakadda sirdoonka falanqeeya ee Africa Intelligence, oo fadhigeedu yahay Faransiiska.
Warbixintu waxay sheegtay in saraakiil ka tirsan CIA-da ay ugu yaraan labo jeer booqdeen Boosaaso tan iyo markii uu bilowday hawlgalka Hillaac ee lagu beegsaday kooxda Daacish ee fadhigeedu ahaa buuraha Calmiskaad.
Xafiiskan cusub ayaa gacan ka geystay fududeynta duqeymo dhinaca cirka ah oo lagu dilay xubno sare oo ka tirsanaa Daacish, iyadoo inta badan dhulkii ay ku sugnaayeen laga saaray.
Sidoo kale, saraakiisha Mareykanka ayaa tababaro siiyey xubno ka tirsan hay’adda sirdoonka Puntland ee PISA, si ay uga caawiso dabagalka iyo baarista shaqsiyaadka looga shakisan yahay falalka argagixisada.
Waxaa intaas dheer, in Boosaaso ay booqdeen xubno ka socda hay’adaha sirdoonka dalalka UK iyo Morocco, taasoo la xiriirta kaddib markii dagaalladii ka dhacay buuraha gobolka Bari lagu dilay xubno haystay dhalashada dalalkaasi.
Hawl-galka Hillaac ayaa hadda keenay in kooxda Daacish looga adkaado meelo muhiim ah, iyadoo xoojinta iskaashiga sirdoonku uu qeyb ka yahay dadaallada lagula dagaalamayo kooxaha argagixisada ee ka howlgala gobollada waqooyi ee Soomaaliya.
Duqeymaha cirka ayaa kaalin muhiim ah ka ciyaaraya dagaalkan oo haatan wejigiisa saddexaad uu bilowday, iyadoo labadii weji ee hore looga sifeeyay kooxda dhul ballaaran oo ay ku sugnaayeen, iyadoo ciidamadu gacanta ku dhigeen saldhigayo muhiim ah oo kooxdu ku laheyd buuraha Calmiskaad.
