Muqdisho (Caasimada Online) –Madaxweynaha Soomaaliya Xasan Sheekh Maxamuud ayaa maanta la shiray Madaxweynayaasha Galmudug, HirShabeelle iyo Koonfur Galbeed, iyadoo shirka ay dib uga soo biireen Ra’iisul Wasaaraha iyo Guddoomiyaha Golaha Shacabka.
Labo qodob ayaa ugu muhiimsanaa kulankii maanta, qodobka koowaad wuxuu ahaa dagaalka Al-Shabaab, kaas oo madaxda dowlad goboleedyada iyo madaxweynaha ay isku aragti ka ahaayeen, waxaana lagu balamay in la dardar geliyo.
Dhinacyada ayaa qeybihii hore ee kulankoodii maanta ku balamay in dagaalka Al-Shabaab si garbo siman ah looga bilaabo deegaanada ay ka joogaan seddaxda dowlad goboleed, iyadoo lagu malamay in waqti kooban lagu soo afjaro kooxda.
Intaas kadib, waxaa loo gudbay gorfeynta qaabka loo dhigayo gogoshii uu ku baaqay Madaxweyne Xasan Sheekh, iyadoo aad looga dooday dhinacyada ay tahay in lagu casuumo.
Madaxda dowlad goboleedyadii joogay kulanka ayaa Madaxweyne Xasan Sheekh kula taliyey inuu raadiyo Jubbaland iyo Puntland, iyagoo u sheegay in hadii uu kuwaas soo helo uu wax kasta xalin karo.
Kulanka Madaxda oo caawa soo gaaray ayaa lagu balamay in mar kale la isku soo laabto, si loo sii gorfeeyo qaabka loo dhigayo gogosha uu ku baaqay Madaxweyne Xasan Sheekh.
Markii la dejiyo ajendaha gogoshaas, sidoo kalena la isla qaato dhinacyada mudan in lagu casuumo ayaa la iclaamo doonaa, sidoo kale waxaa jira safar dibadda ah oo soo galay Xasan Sheekh, balse markii uu soo laabo ayaa la guda geli doonaa furitaanka gogosha.
Ra’iisul Wasaare Xamza iyo guddoomiye Aadan Madoobe ayaa taladooda ku biiriyey madaxda oo kulankoodii maanta ku gorfeeyey arrimaha dagaalka iyo qorsheynta gogosha uu ku baaqay Madaxweyne Xasan Sheekh.
